ബെർലിൻ: പടിഞ്ഞാറൻ ജർമൻ നഗരമായ ബോഹുമിലെ റസിഡൻഷ്യൽ അപ്പാർട്ട്മെന്‍റ് സമുച്ചയത്തിലുണ്ടായ വൻ തീപിടിത്തത്തിൽ മൂന്ന് മലയാളികൾ ദാരുണമായി മരിച്ചു. ഇടുക്കി കട്ടപ്പന ശാന്തിഗ്രാം കൊച്ചിടേട്ടേൽ റിട്ട.എസ്ഐ കെ.പി. സാബുവിന്‍റെ മകൾ നോവ സാബു (26), കൊല്ലം ചെമ്മക്കാട് സെന്‍റ് സെബാസ്റ്റ്യൻസ് പള്ളിക്കു സമീപം അശ്വിനി നിവാസിൽ ജോയ്-ഷീല ദന്പതികളുടെ മകൾ അഞ്ജലി (25), എറണാകുളം കാലടി സ്വദേശി സിവിൻ ജോണി (27) എന്നിവരാണ് മരിച്ചത്. സംഭവത്തിൽ അഞ്ചുപേർക്ക് പരിക്കേൽക്കുകയും ചെയ്തു.
ചൊവ്വാഴ്ച പുലർച്ചെ 4.15ന് ബോഹും ഹോഫ്സ്റ്റെഡെ മേഖലയിലെ പോസ്റ്റ് ഓഫിസ് റോഡിലുള്ള ബഹുനിലക്കെട്ടിടത്തിലായിരുന്നു അപകടം. മരിച്ച മൂന്നുപേരും രണ്ടാഴ്ച മുമ്പ് മാത്രമാണ് ഈ കെട്ടിടത്തിലെ രണ്ടാം നിലയിലെ അപ്പാർട്ട്മെന്‍റിൽ താമസത്തിനെത്തിയത്.
തീപിടിത്തം ആസൂത്രിതമാണെന്നു കണ്ടെത്തിയതോടെ ഇതേ കെട്ടിടത്തിൽ താമസിക്കുന്ന റുമേനിയൻ സ്വദേശിയായ 41 കാരനെ പൊലിസ് അറസ്റ്റ് ചെയ്തു. ഇയാളെ ചോദ്യംചെയ്തുവരികയാണ്. തീവയ്പ് മലയാളികളെ ലക്ഷ്യമിട്ടായിരുന്നില്ലെന്നാണ് സൂചന. താഴത്തെ നിലയിലെ ഇടനാഴിയിൽ സൂക്ഷിച്ചിരുന്ന കുട്ടികളുടെ സ്ട്രോളറുകൾക്ക് തീവച്ചതാകാമെന്നും തുടർന്ന് മുകളിലേക്കുള്ള തടിഗോവണിയിലേക്ക് തീ ആളിപ്പടർന്നതാണ് വലിയ ദുരന്തത്തിനു കാരണമായതെന്നുമാണ് പൊലിസിന്‍റെ പ്രാഥമിക നിഗമനം. കെട്ടിടത്തിൽനിന്ന് പുറത്തിറങ്ങാനുള്ള ഏക വഴിയായ തടിഗോവണി പൂർണമായി കത്തുകയും ഇടനാഴിയിലാകെ കനത്ത പുകയും ചൂടും പടരുകയും ചെയ്തത് രക്ഷാപ്രവർത്തനം ദുഷ്കരമാക്കി. പലരും ജനലുകളിലൂടെയാണ് സഹായം അഭ്യർഥിച്ചത്. സ്ഥലത്തെത്തിയ അഗ്‌നിരക്ഷാസേന ടേൺടേബിൾ ലാഡറുകളും പോർട്ടബിൾ ഗോവണികളും ഉപയോഗിച്ചാണ് നാലുപേരെ താഴെയിറക്കിയത്. ഒരാൾ സേഫ്റ്റി കുഷ്യനിലേക്ക് ജനലിലൂടെ എടുത്തുചാടുകയായിരുന്നു.
തീ നിയന്ത്രണവിധേയമാക്കിയശേഷം നടത്തിയ പരിശോധനയിലാണു രണ്ടാം നിലയിലെ ഫ്ലാറ്റിൽ മലയാളികളെ മരിച്ച നിലയിൽ കണ്ടെത്തിയത്. തീപിടിത്തമുണ്ടായതിനു തലേദിവസം ഇതേ കെട്ടിടത്തിൽ താമസക്കാർ തമ്മിൽ തർക്കമുണ്ടായിരുന്നു. ഈ സംഭവത്തിന് തീപിടിത്തവുമായി ബന്ധമുണ്ടോയെന്ന് പൊലിസ് അന്വേഷിച്ചുവരികയാണ്.
നോവയുടെ അമ്മ ജ്യോതി ചെന്പകപ്പാറ പിഎച്ച്സിയിലെ നഴ്സാണ്. ജിം ട്രെയ്നറായ നോവ ജൂലൈ മൂന്നിനാണ് ജർമനിക്ക് പോയത്.
രണ്ടാഴ്ച മുന്പാണ് സിവിൻ ജർമനിയിൽ എത്തിയത്. അമ്മ : പരേതയായ ലിസി സഹോദരി : സിമി (അയർലൻഡ്) സാഹോദരൻ : സാൽവിൻ, ജർമനി).
ജർമനിയിൽ മൂന്നു മലയാളികൾ തീവയ്പിൽ കൊല്ലപ്പെട്ട സംഭവം ആസൂത്രിതം; അയൽവാസി കസ്റ്റഡിയിൽ
