ന്യൂയോർക്ക്: അയച്ച സന്ദേശങ്ങള് നീക്കം ചെയ്യാനുള്ള ‘ഡിലീറ്റ് ഫോര് എവരിവണ്’ ഫീച്ചര് വാട്സ്ആപ്പ് പരിഷ്കരിച്ചു. സന്ദേശം ലഭിച്ച ഫോണിൽ ഡിലീറ്റ് റിക്വസ്റ്റ് സ്വീകരിക്കാനുള്ള സമയപരിധി 13 മണിക്കൂറും 8 മിനിറ്റും 16 സെക്കൻഡുമായി ദീർഘിപ്പിച്ചു. എന്നാൽ സന്ദേശങ്ങള് പിന്വലിക്കാനുള്ള സമയപരിധി നിലവിലുള്ള ഒരുമണിക്കൂറും എട്ടു മിനിറ്റും 16 സെക്കൻഡും തന്നെയായി തുടരും.
‘ഡിലീറ്റ് ഫോര് എവരിവണ്’ ഉപയോഗിച്ചുള്ള പിൻവലിക്കൽ അപേക്ഷ സ്വീകർത്താവിന്റെ ഫോണിൽ ലഭിച്ചാൽ മാത്രമേ ആ സന്ദേശം അപ്രത്യക്ഷമാവുകയുള്ളൂ. നിലവിൽ സന്ദേശം ലഭിച്ച ഫോണിൽ ഡിലീറ്റ് റിക്വസ്റ്റ് അംഗീകരിക്കുന്നതിനുള്ള സമയം ഒരു മണിക്കൂറും എട്ടു മിനിറ്റും 16 സെക്കൻഡാണ്. ഇതാണ് 13 മണിക്കൂറും 8 മിനിറ്റും 16 സെക്കൻഡായി വർധിപ്പിച്ചത്. ഈ സമയ പരിധിക്കുള്ളിൽ എപ്പോഴെങ്കിലും ഫോൺ പ്രവർത്തനക്ഷമമായാൽ സന്ദേശം നീക്കം ചെയ്യപ്പെടും.
വാട്സ്ആപ്പ് ആദ്യമായി ഡിലീറ്റ് ഫോര് എവരിവണ് ഫീച്ചര് അവതരിപ്പിക്കുമ്പോള് സമയപരിധി ഏഴ് മിനിറ്റ് മാത്രമായിരുന്നു. ഈ വർഷമാദ്യം ഒരുമണിക്കൂറിലധികമായി സമയപരിധി വര്ധിപ്പിക്കുകയായിരുന്നു.