വടകര: യുവാവിന്‍റെ മുഖത്തും കണ്ണിലും ആസിഡ് ഒഴിച്ച് പൊള്ളലേൽപ്പിച്ച സംഭവത്തിൽ യുവതിക്ക് ശിക്ഷ. കാവിലുംപാറ പോടം കാട്ടുമ്മൽ പരപ്പുമ്മൽ അഷറഫിന്‍റെ ഭാര്യ നസീമയെയാണ് (43)വടകര അസിസ്റ്റന്‍റ് സെഷൻസ് കോടതി ശിക്ഷിച്ചത്.
ഒരു വർഷം തടവും പതിനായിരം രൂപ പിഴയുമാണ് ശിക്ഷ. പിഴ അടച്ചില്ലെങ്കിൽ മൂന്ന് മാസം കൂടി തടവ് അനുഭവിക്കണം. രണ്ടാം പ്രതിയായ കാവിലുംപാറ ഓടൻ കുന്നുമ്മൽ ഗിരീഷ്കുമാറിനെ (37)കുറ്റക്കാരനല്ലെന്ന് കണ്ട് കോടതി വെറുതെ വിട്ടു.
2011 ഡിസംബർ 29 നാണ് കേസിനാസ്പദമായ സംഭവം. കാവിലുംപാറ വാഴയിൽ ലിനീഷിന്‍റെ (37) മുഖത്താണ് പ്രതി ആസിഡ് ഒഴിച്ചത്.
