കടുത്തുരുത്തി: കാറില് കടത്തുകയായിരുന്ന എംഡിഎംഎയുമായി രണ്ട് യുവാക്കള് പോലീസ് പിടിയില്. ഏറ്റുമാനൂര് തെള്ളകം തടത്തില്പറമ്പില് നാദിര്ഷ (26), ആര്പ്പൂക്കര വില്ലൂന്നി കണിച്ചേരില് വീട്ടില് ആല്ബിന് ബാബു (24) എന്നിവരെയാണ് ജില്ലാ പോലീസ് ചീഫിന്റെ ഡാന്സാഫ് സംഘം പിടികൂടിയത്.
തലയോലപ്പറമ്പ് തലപ്പാറയ്ക്ക് സമീപത്ത് വച്ചു ഇന്നലെ വൈകൂന്നേരം നാലോടെ നര്ക്കോട്ടിക് സ്പെഷല് സംഘം കാറിന് കൈ കാണിച്ചെങ്കിലും വാഹനം അമിതവേഗത്തില് കോട്ടയം ഭാഗത്തേക്ക് ഓടിച്ചു പോവുകയായിരുന്നു.പിന്തുടര്ന്നെത്തിയ പോലീസ് സംഘം മുട്ടുചിറ പട്ടാളമുക്കിന് സമീപത്ത് വച്ചു യുവാക്കള് സഞ്ചരിച്ചിരുന്ന കാര് തടഞ്ഞാണ് പ്രതികളെയും മയക്കുമരുന്നും കസ്റ്റഡിയിലെടുത്തത്.
ഡാന്സാഫ് സംഘം സാന്ട്രോ കാറിന്റെ ചില്ല് കല്ലിനെറിഞ്ഞ് പൊട്ടിച്ച ശേഷമാണ് വാഹനം നിര്ത്താന് യുവാക്കള് തയാറായത്.ടിന്നില് സൂക്ഷിച്ചിരുന്ന 140 ഗ്രാമോളം വരുന്ന എംഡിഎംഎയാണ് ഇവരില്നിന്ന് കണ്ടെത്തിയത്. ബാംഗളൂരുവില്നിന്ന് കാറില് ലഹരി കടത്തുന്നതായുള്ള രഹസ്യവിവരം ലഭിച്ചതിനെ തുടര്ന്ന് നടത്തിയ പരിശോധനയിലാണ് ഇവര് പിടിയിലായത്. യുവാക്കളെ ഇന്ന് കോടതിയില് ഹാജരാക്കും.
സംഭവമറിഞ്ഞ് വൈക്കം തഹസില്ദാര് ബിബിന് ഭാസ്കര് സ്ഥലത്തെത്തി പരിശോധനയ്ക്കു മേല്നടപടി സ്വീകരിച്ചു. കടുത്തുരുത്തി എസ്ഐ ടി. ദീപുവിന്റെ നേതൃത്വത്തില് കടുത്തുരുത്തി പോലീസ് സംഘവും സ്ഥലത്തെത്തിയിരുന്നു. സമീപകാലത്തുണ്ടായ ഏറ്റവും വലിയ ലഹരി വേട്ടയാണിത്.ഇന്നലെ ഉച്ചയ്ക്കു തലയോലപ്പറമ്പ് തലപ്പാറയില് വച്ചു കാറില് കടത്തുകയായിരുന്ന രണ്ട് കിലോ കഞ്ചാവുമായി രണ്ടു യുവാക്കള് അറസ്റ്റിലായിരുന്നു.
